प्रधानमन्त्रीको प्रश्न– न्यायाधीश र प्रधानमन्त्रीबीच भेटघाट भएको समाचार कसले प्रमाणित गर्न सक्छ ?
उनले 'प्रधानमन्त्रीसँग न्यायाधीशहरुको भेटघाट भएको' समाचार झुटो भएको बताउँदै भने, ‘के यो प्रमाणित गर्न सक्छन् ? उनीहरुलाई प्रमाणित गर्नु छैन । न्यायालयविरुद्ध हल्ला फिँजाउनु मात्र छ ।’
काठमाडौं– न्यायाधीशहरु र प्रधानमन्त्रीबीच भेटघाट भएको भन्ने समाचारको खण्डन गर्दै प्रधानमन्त्री केपी शर्मा ओलीले सो समाचार प्रमाणित गर्न चुनौती दिएका छन् । आइतबार राजधानीमा आयोजित अखिल नेपाल महिला संघ केन्द्रीय समितिको दोस्रो बैठकलाई सम्बोधन गर्दै ओलीले सो भेटघाट प्रमाणित गर्न चुनौती दिएका हुन् ।
उनले प्रधानमन्त्रीसँग न्यायाधीशहरुको भेटघाट भएको समाचार झुटो भएको बताउँदै भने, ‘के यो प्रमाणित गर्न सक्छन् ? उनीहरुलाई प्रमाणित गर्नु छैन । न्यायालयविरुद्ध हल्ला फिँजाउनु मात्र छ ।’
ओलीले न्यायालयको हुर्मत लिएर स्वतन्त्र न्यायापालिकामाथि आक्रमण भएको बताए । पछिल्लो समय केही समूह न्यायालयको विरुद्धमा लागेको संकेत गर्दै ओलीले भने, ‘न्यायाधीशहरुले प्रधानमन्त्रीलाई भेटे भनेर अनर्गल समाचार सम्प्रेषण गरियो । यो अदालतमाथिको जनविश्वास कमजोर पार्ने कार्य हो ।’
