जर्जियामा सिनेटका लागि मंगलबार मतदान, बाइडेनको अग्निपरीक्षा
गत नोभेम्बरमा भएको चुनावमा कुनै पनि उम्मेदवारले स्पष्ट बहुमत अर्थात् ५० वा सोभन्दा बढी प्रतिशत मत नल्याएपछि दोस्रो चरणको चुनाव हुन लागेको हो ।
एटलान्टा– अमेरिकाको जर्जिया राज्यमा मंगलबार सिनेटका लागि मतदान हुँदै छ । अमेरिकी राष्ट्रपतिमा निर्वाचित जो बाइडेनको पहिलो दुई वर्षे कार्यकालको सफलतासँग पनि यो चुनाव जोडिएकाले रिपब्लिकन र डेमोक्रेट दुवै पार्टीका लागि महत्त्वपूर्ण मानिएको छ ।
यस राज्यमा राष्ट्रपति र सिनेट दुवैमा रिपब्लिकन पार्टीले विगत २० वर्षदेखि चुनाव जित्दै आएको छ । तर यस पटक जर्जिया राज्यले डेमोक्रेटिक पार्टीबाट राष्ट्रपतिका उम्मेदवार जो बाइडेनलाई मतदान गरेको छ । अमेरिकी सिनेटको इतिहासमै जर्जियामा यसपटक रिपब्लिकन र डेमोक्रेट दुवैले सबैभन्दा बढी रकम खर्च गर्दै छन् ।
निर्वाचन अधिकारीहरुका अनुसार मतदान स्थानीय समय अनुसार मंगलबार बिहान ७ बजेदेखि सुरु हुनेछ । यस राज्यमा करिब ३० लाख व्यक्तिले मतदान गरिसकेको निर्वाचन अधिकारीले बताएका छन् । यस राज्यको अन्तिम, आधिकारिक मत परिणाम प्राप्त गर्न केही दिन लाग्ने अनुमान गरिएको छ । यस राज्यमा निर्वाचन अभियानको विज्ञापनका लागि मात्र उम्मेदवारले ५० करोड डलर खर्च गरिसकेका छन् ।
रिपब्लिकन र डेमोक्रेटिक दुवै पार्टीका हजारौं स्वयंसेवीले राज्यका सबैजसो घरदैलोमा पुगेर मतदातालाई आफ्नो दललाई समर्थन गर्न आहवान गरिरहेका छन् । चुनावमा आफ्ना समर्थकलाई विजयी गराउन राष्ट्रपति डोनाल्ड ट्रम्प र राष्ट्रपति निर्वाचित जो बाइडेन दुवै सक्रियतापूर्वक लागेका छन् ।
एटलान्टामा आयोजित चुनावी सभामा बाइडेनले जर्जियाली जनतालाई अर्को चार वर्षका लागि मात्र नभएर अर्को पुस्ताका लागि मतदान गर्न आग्रह गरे । जर्जियामा रिपब्लिकनका तर्फबाट सिनेटर केल्ली लोफलर र डेभिड पर्ड्यु तथा डेमोक्रेट पार्टीका तर्फबाट राफेल वार्नक र जोन ओसोफ प्रतिस्पर्धामा छन् । गत नोभेम्बरमा भएको चुनावमा कुनै पनि उम्मेदवारले स्पष्ट बहुमत अर्थात् ५० वा सोभन्दा बढी प्रतिशत मत नल्याएपछि दोस्रो चरणको चुनाव हुन लागेको हो ।
