‘रेडियो नेपाल कुनै पार्टी, व्यक्तिको होइन, यो करोड नेपालीको हो’

काठमाडौं, चैत २० : सञ्चार तथा सूचना प्रविधिमन्त्री पृथ्वीसुब्बा गुरूङले रेडियो नेपाल कुनै पार्टी, व्यक्ति वा सरकारको नभैइ ं३ करोड नेपालीको  भएको बताएका छन्।

बुधबार रेडियो नेपालको ७५औं वार्षिकोत्सव तथा हिरक महोत्सवमा बोल्दै उनले रेडियो नेपाल जति समृद्ध र प्रभावकारी हुन्छ त्यति नै सिंगो नेपाली र राष्ट्रको  माया पाउने भएकाले यो सबै  नेपालीको भएको बताएका हुन्।

‘रेडियो नेपाल ३ करोड नेपालीको हो। यो  कुनै व्यक्ति, पार्टीको, सरकारको होइन। सत्य तथ्य जानकारी जनताका बिचमा सम्प्रेषण गर्ने कुरामा रेडियो  नेपालको ठूलो  भूमिका छ। रेडियो  नेपाल जति समृद्ध र प्रभावकारी हुन्छ त्यति नै सिंगो नेपाली र राष्ट्रको माया पाउने छ,’ उनले भने, ‘नेपालको समृद्धिको लागि, नेपालको  बेथिती अन्त्य गर्नको लागि र जनताको सूचनाको हकलाई प्रत्याभूत गर्ने कुरा र जनताको अभिव्यक्ति स्वतन्त्रता र जनताको गोपनियतालाई कायम राखेर चाहिँ यसले  आफ्नो अभियानहरु सुरु गर्नुपर्छ। संसारभरी रहेका नेपालीहरुको लागि पनि यो रेडियो नेपाल हो।’

मन्त्री गुरुङले रेडियो नेपाल स्वायत्त भएर आफ्नो नीति कार्यक्रमहरू अगाडि सारेर अगाडि बढ्नुपर्ने बताए। देश र जनताप्रति उत्तरदायी बनेर काम गर्ने लक्ष्य उनले रेडियो नेपालको हुनुपर्ने उनले बताए।

विगतको इतिहास हेर्ने हो भने सत्ताको पञ्जाभित्र परेर अधिनायकवादी आउँदाखेरि अधिनायकवादीकै गान गाउने, लोकतन्त्र आउँदोखरि लोकतन्त्रकै गुणगान गाउने खालको जुन भूमिका रेडियो नेपालको थियो आज त्यो सम्पूर्ण रुपमा परिवर्तन भएको उनले बताए। 

अब लोकतन्त्र गणतन्त्रको सारथी भएर देश र जनताको  हितको लागि रेडियो  नेपालले आफ्नो कार्यक्रमहरु अगाडि सार्नेमा आफू विश्वस्त रहेको मन्त्री गुरुङले बताए।