समाजवादी मोर्चाले भन्यो– शुक्रबारको घट्ना योजनावद्ध हो, विदेशीको पनि संलग्नता छ

काठमाडौं, चैत १८ : समाजवादी मोर्चाले शुक्रबार राजावादीहरुले योजनावद्ध रुपमा हिंसात्मक घट्ना घटाएको जनाएको छ। 

सोमबार पेरिसडाडाँमा बसेको समाजवादी मोर्चाको बैठकले शुक्रबार राजावादीहरुले योजनावद्ध रुपमा हिंसात्मक घट्ना घटाएको भन्दै यसमा विदेशीहरुको पनि संलग्नता देखिएको भन्ने निष्कर्ष रहेको प्रवक्ता खड्गबहादुर विश्वकर्माले जानकारी दिए। 

घटना नियन्त्रण लागि सरकार पनि चुकेको मोर्चाको ठम्याई रहेको उनले बताए। 

‘घटना जसरी घटेको छ त्यो योजनवद्धरुपमा गरिएको छ। व्यवस्था पल्टाउने कोसिस गरिरहन्छन्। मुर्खता गरिहन्छन्। विदेशीहरुले कतै न कतै व्याकिङ गरेको हो कि भन्ने देखिन्छ। त्यसलै यो घट्नालाई लिएर मोर्चाको तर्फबाट सशक्क्त भण्डाफोर गर्नुपर्छ,’ उनले भने, ‘घटना नियन्त्रण गर्न सरकारको तर्फबाट अलि अपुग भयो कि भन्ने छ। योजनावद्ध रुपमा घट्ना घटाइयो त्यसमा संलग्नलाई कारवाहीको माग सरकारसँग गर्दैछौं।’

प्रतिगामी शक्तिहरुले देशमा अशान्ति र आतंक मच्चाउने प्रबृत्ति देखिएकाले मोर्चाको तर्फबाट सशक्क्त भण्डाफोर गर्ने निर्णय भएको विश्वकर्माले जनाए। 

‘शुक्रबार प्रतिगामी शक्तिहरु दरवारीया तत्वहरुको जुन गतिबिधि देखियो असाध्यै गैरजिम्मेवार छ । देशमा अशान्ति र आतंक मच्चाउन मनशास देखिन्छ,’ उनले भने, ‘हिंसात्मक छ। बढो जंगली चरित्रको छ । त्यसलाई रक्षात्मक बनाउनको लागि अथवा त्यसलाई कमजोर बनाउनको लागि १५ गतेको विरोध सभाले धेरै भूमिका निर्वाह गरेको छ। क्षतिपूर्ति पनि सरकारले असुल गर्नुपर्छ।’

मार्चाले १५ गते गरेको आमसभाको समिक्षा पनि गरेको उनले बताए।। सभा ऐतिहासिक, अत्यन्तै शालिन, शानदार, भव्य र अनुशासित रुपमा सफल भएको मोर्चाको दाबी छ।