ज्ञानेन्द्र शाहले ऐतिहासिक निर्णयपछि भएको सम्झौताको उल्लघंन गरे : प्रधानमन्त्री ओली

काठमाडौं, चैत १८ : प्रधानमन्त्री केपी ओलीले शुक्रबार तीनकुने घटनामा संलग्न जुनसुकै कभरमा बसेपनि कडा प्रशासनिक कारबाही गर्ने चेतावनी दिए। 

‘शुक्रबार तीनकुनेमा भएको शान्तिपूर्ण आन्दोलन भनिएकोमा आपराधिक घटना सुरु गरियो । आगजनी गरियो। मानिसलाई घरभित्रै थुनेर बाहरिबाट ताल्चा लगाएर जिउँदै जलाएर हत्या गरियो। प्रहरीको बन्दुक खोस्ने, कुटपीट गर्ने ढुंगामुडा, तोडफोट, लुटपात जस्ता अपराधिक घट्ना गरियो,’ उनले भने, ‘अन्य आतंककारी काम समेत भयो। यी सबै निन्दनीय र खेलजनक क्रियाकलाप हुन्। यस्ता घटनामा संलग्नहरुमाथि जोसुकै जोस्, जुनसुकै कभरमा किन नहुन कडा प्रशासनिक कारबाही हुन्छ।’ 

उनले यसका योजनाकार को हुन् र को को संलग्न छन भन्ने विषयमा सरकारले छानबीन र अनुसन्धान गरिरहेको पनि संसदमा जानकारी गराए।

पूर्वराजा ज्ञानेन्द्र शाहले समाज बिथोल्न लागिपरेका दुर्गा प्रसाईलाई आफ्नै निवासमा डाकेर जनकमाण्डर तोकेर हिंसात्मक क्रियाकलापको लागि खटाएको पनि उनको भनाई छ। 

ज्ञानेन्द्रले संविधानको ऐतिहासिक निर्णयपछि भएको सम्झौताको उल्लङघन गरेको पनि प्रधानमन्त्री ओलीको आरोप छ। 

‘यसका योजनाकार को हुन र को को संलग्न छन्। सरकारले यस विषयमा छानविन र अनुसन्धान गरिरहेको छ । चैत्र १४ गते समाज विथोल्न लागिपरेका एकजना व्यक्तिलाई आफ्नै निवासमा डाकेर जनकमाण्डर तोक्नुभयो र हिंसात्मक वारका लागि खटाउनुभयो,’ उनले भने, ‘प्रारम्भिक अध्ययनले स्पष्ट पार्छ । पूर्वराजा ज्ञानेन्द्र शाहले संविधानको ऐतिहासिक निर्णयपछि भएको सम्झौताको उल्लङघन गर्नुभएको छ।’