पछाडि परेका वर्गको जीवनस्तर सुधार गर्नु गणतन्त्रको लक्ष्यः राष्ट्रपति

काठमाडौं, मंसिर ५ । राष्ट्रपति रामचन्द्र पौडेलले समाजमा पछाडि परेका क्षेत्र र वर्गको हित एवम् आम नागरिकको जीवनस्तर सुधार गरी भविष्य सुरक्षित रहेको आभाष दिलाउन सक्नुपर्ने बताएका छन्।

राष्ट्रपति पौडेलले यही व्यवस्थामा मात्रै आफ्नो भविष्य रहेको महशुस हुने गरी भरोसा जागृत गराउनु संघीय लोकतान्त्रिक गणतन्त्रको लक्ष्य भएको समेत बताए।

बुधबार दिउँसो राष्ट्रपति भवन शीतल निवासमा आयोजित महेन्द्रनारायण निधिको संघर्षमय जीवनीमा आधारित नेपालका निधि नामक पुस्तक लोकार्पण गर्दै पौडेलले यस्तो भनाई राखेका हुन्।

संघीय लोकतान्त्रिक गणतन्त्रको लक्ष्य पूरा गर्न न्यायपूर्ण, समावेशी र समृद्ध आधुनिक नेपाल बनाउने काममा सवै जुट्नुपर्ने पनि उनले बताए।

साथै, राष्ट्रपति पौडेलले जनतामा भरोसा जगाउन शासन प्रणाली पारदर्शी, जवाफदेही र सुशासन पहिलो शर्त भएको पनि बताए । सत्ता र शक्तिमा बस्नेका कमजोरीले लोकतन्त्रका शाश्वत मूल्य मान्यता अनि पवित्रतालाई धुमिल बनाउने अवस्था आउन दिन नहुने भनाई उनको थियो ।

‘यी कुरामा ध्यान दिन सके नै लोकतन्त्रको मूल्यमा कसैसँग संझौता नगर्ने निधिजी लगाउतका अग्रजहरूप्रति सच्चा सम्मान हुनेछ भन्ने पनि म ठान्दछु,’ राष्ट्रपति पौडेलले भने ।

कार्यक्रममा महेन्द्रनारायण निधिका बहुआयामिक व्यक्तित्व, नेपालमा लोकतन्त्र स्थापना र पुनस्र्थापना तथा सामाजिक, सांस्कृतिक जागरणबारे जान्न र बुझ्न चाहनेका लागि पनि सङग्रहणीय सामग्री हुने पनि राष्ट्रपति पौडेलले बताए ।

निधी बिपी कोइराला र समाजवादी नेता डा.राममनोहर लोहियाका चिन्तनबाट प्रभावित भएका नेपालको लोकतान्त्रिक आन्दोलनको अग्रणी व्यक्ति भएको स्मरण समेत पौडेलले गरे । नीधिले देशको राजनीति, आर्थिक र सामाजिक परिवर्तनका लागि आफ्नो जीवन समर्पित गरेको स्मरण पौडेलले गरे ।

‘जहानियाँ राणाशासन र एकदलीय पञ्चायत मात्र होइन रुढीवादी, पछौटेपन तथा कुसंस्कारबाट मुक्त गरी नेपाली समाजलाई परिवर्तनको उज्यालो मार्गमा अघि बढाउन निधिजीले खेल्नुभएको भूमिका सदैव अनुकरणीय छ,’ राष्ट्रपति पौडेलले भने, ‘राजनीतिक जीवनका अनेकौ उतारचढावका दिनमा मैले निधिजीलाई अन्यन्त, धैर्यवान, सरल, सादगी नेताका रुपमा चिन्ने र बुझ्ने मौका पाएको छु ।’