पुथा उत्तरगंगा–२ को वडाध्यक्षमा माओवादीका जगत घर्ती निर्विरोध निर्वाचित

रुकुम पूर्व, मंसिर ५ : रुकुम पूर्वको पुथा उत्तरगंगा गाउँपालिका–२ को वडाध्यक्षमा अन्य उम्मेदवारले उम्मेदवारी फिर्ता लिएपछि नेकपा माओवादी केन्द्रका जगत घर्ती निर्विरोध निर्वाचित भएका छन्। 

एमालेका उम्मेवार जीवन रोका र स्वतन्त्र उम्मेदवार शुक्रराज विकले उम्मेदवारी फिर्ता लिएपछि घर्ती निर्विरोध भएका हुन्। 

निर्वाचन आयोगको कार्यतालिका अनुसार उम्मेदवारी फिर्ता लिने अन्तिम दिन अन्य दलका उम्मेदवार र स्वतन्त्र उम्मेदवारले नाम फिर्ता लिएका हुन्। घर्ती निर्विरोध निर्वाचित भएपनि निर्वाचन आयोगले घोषणा गर्न भने बाँकी छ। 

पुथा उत्तरगंगामा सत्तारुढ दुई दल नेपाली कांग्रेस र नेकपा एमालेले तालमेल गर्दै उम्मेदवारी दिएका थिए। 

गाउँपालिका उपाध्यक्षमा एमालेकी केशकुमारी तुलाचनले कांग्रेसको निर्वाचन चिह्नमा उम्मेदवारी दिएकी थिइन्। वडा नं. २ मा पनि एमालेका  उम्मेदवारलाई कांग्रेसले सर्मथन गरेको थियो।