थप ८ मन्त्रालयको जिम्मेवारी प्रधानमन्त्रीलाई

काठमाडौं, असार २० : प्रधानमन्त्री पुष्पकमल दाहालले थप ८ मन्त्रालयको जिम्मेवारी पाएका छन्।

एमालेका मन्त्रीहरूले राजीनामा दिएपछि खाली भएका ८ मन्त्रालयको जिम्मेवारी पनि प्रधानमन्त्री दाहालमा आएको हो।

राष्ट्रपति रामचन्द्र पौडेलले मौजुदा मन्त्रिपरिषद्का उपप्रधानमन्त्री एवं भौतिक पूर्वाधारमन्त्री रघुवीर महासेठसहित आठजना मन्त्रीले पदबाट राजीनामा दिएपछि उनीहरुले सम्हालेका मन्त्रालयहरुको कार्यभार प्रधानमन्त्री दाहालले स्वयंले सम्हाल्ने गरी तोकेका छन्।
राष्ट्रपति कार्यालयकी प्रवक्ता शैलजा रेग्मी भट्टराईले विहीबार एक विज्ञप्ति जारी गर्दै प्रधानमन्त्री दाहालको सिफारिसमा राष्ट्रपतिले प्रधानमन्त्री स्वयंलाई ती मन्त्रालयको कार्यभार तोकिएको जनाइएको छ।

बुधबार कानुन न्याय तथा संसदीय मामिलामन्त्री पदम गिरी, कृषि तथा पशुपक्षी विकासमन्त्री ज्वालाकुमारी साह, भूमि व्यवस्था सहकारी तथा गरिबी निवारणमन्त्री बलराम अधिकारी, उद्योग वाणिज्य तथा आपूर्तिमन्त्री दामोदर भण्डारी, महिला बालबालिका तथा ज्येष्ठ नागरिक मन्त्री भगवती चौधरी, खानेपानीमन्त्री राजेन्द्रकुमार राई र रक्षामन्त्री हरिप्रसाद उप्रेतीले राजीनामा दिएका थिए।