टेबल टेनिस प्रतियोगिता सम्पन्न

काभ्रे, माघ १७ : स्थापनाको २५औं वर्षको अवसरमा पनौतीस्थित काभ्रे इंग्लिस माध्यमिक विद्यालयले जिल्ला स्तरीय अन्तरविद्यालय पुरुष टेबल टेनिस प्रतियोगिता आयोजना गरेको छ।

काभ्रेका २५ विद्यालय सम्मिलित प्रतियोगितामा ज्ञान सरोवर माध्यमिक विद्यालय, बनेपाका शरद कर्माचार्यले जितेका छन्। यस्तै, द्वितीय र तृतीय स्थान क्रमशः सरस्वती कुञ्ज बोर्डिङ स्कुल पनौतीका देव शाही र श्रीराम मावि, खोपासीका विरेन्द्र तामाङले भए।

विजयीलाई जिल्ला खेलकुद विकास समिति काभ्रेका अध्यक्ष मानवीर वाइवा, काभ्रे जिल्ला प्याब्सन अध्यक्ष श्याम भुजेल र विद्यालयका प्राचार्य बसन्तराज नेपालले  मेडल, प्रमाणपत्र र नगद पुरस्कार प्रदान गरे।

कार्यक्रमका प्रमुख अतिथि काभ्रे जिल्ला खेलकूद विकास समितिका अध्यक्ष वाइवाले विद्यार्थीहरुलाई मोबाइल फोन तथा सामाजिक सञ्जालको प्रयोगबाट निस्किएर खेलकूदमा लाग्न आग्रह गरे।

काभ्रे जिल्ला प्याब्सन अध्यक्ष श्याम भुजेलले खेलकुदले विद्यार्थीको सामाजिकीकरणमा प्रत्यक्ष रुपमा सकारात्मक भूमिका खेल्ने बताए। यस्तै, विद्यालयका प्राचार्य बसन्तराज नेपालले विद्यार्थी केन्द्रित कार्यक्रमलाई कक्षाकोठामा मात्र होइन समुदायमा लैजानुपर्ने बताए।