बाग्मती प्रदेशका मुख्यमन्त्री डोरमणि पौडेलविरुद्ध अविश्वासको प्रस्ताव दर्ता

काठमाडौं– बाग्मती प्रदेशका मुख्यमन्त्री डोरमणि पौडेलविरुद्ध प्रदेशसभामा शुक्रबार अविश्वास प्रस्ताव दर्ता गरिएको छ । नेपाल कम्युनिस्ट पार्टी  (नेकपा) दाहाल–नेपाल समूहले पौडेलविरुद्ध अविश्वास प्रस्ताव दर्ता गरेको हो ।

सांसद अरुण नेपालले अविश्वास प्रस्ताव प्रदेशसभा बैठकमा प्रस्तुत गरेका हुन् । अविश्वास प्रस्तावमाथि १९ माघदेखि छलफल सुरु हुने सभामुख सानुकमार श्रेष्ठले सदनलाई जानकारी दिएका छन् ।

गत पुस १० गते प्रदेश सरकारका तीन मन्त्रीसहित सत्तापक्षका ४५ प्रदेशसभा सदस्यले मुख्यमन्त्री पौडेलविरुद्ध अविश्वासको प्रस्ताव दर्ता गरेका थिए । अविश्वासका प्रस्तावमा मुख्यमन्त्री पौडेललाई पदमुक्त गरी मुख्यमन्त्रीमा प्रदेशसभा सदस्य अष्टलक्ष्मी शाक्यलाई अगाडि सारिएको छ ।     
     
बैठकमा सभामुख सानुकुमार श्रेष्ठले मुख्यमन्त्रीविरुद्धको अविश्वासको प्रस्ताव पेस गर्न प्रस्तावको पहिलो हस्ताक्षरकर्ता  नेपाललाई समय दिएका थिए ।

अविश्वास प्रस्ताव प्रस्तुत गर्दै नेपालले कोभिड नियन्त्रणमा प्रदेश सरकारले कुनै पनि भूमिका खेल्न नसकेको, अपराध न्यूनीकरण, महँगी नियन्त्रणलगायत काममा ध्यान नपु¥याएको, समाजवादोन्मुख काम गर्न नसकेको, गरीबी नियन्त्रणमा काम गर्न नसकेको आरोप लगाए ।     
 

 Published Date: Friday, 22nd January 2021 2:15:00 pm