दाङ, कात्तिक १२ : दाङको तुलसीपुरका एक युवकको खुट्टा छिनालिएको घटनामा प्रहरीले ३३ जनालाई पक्राउ गरेको छ।

आफन्तको बिहेमा सहभागी भएर घर फर्किँदै गर्दा तुलसीपुरका कुमार  विकमाथि आक्रमण भएको थियो। आक्रमणकारीले उनको खुट्टा छिनालेका थिए। उनी सोमबार घाइते अवस्थामा भेटिएका थिए।

उनलाई कुटपिट गरेको घटनामा अनुसन्धानका लागि तुलसीपुर इलाका प्रहरी कार्यालयले ३३ जनालाई नियन्त्रणमा लिएको जनाएको छ। इलाका प्रहरी कार्यालयका डिएसपी शिवबहादुर सिंहले नियन्त्रणमा लिएका युवासँग सोधपुछ भइरहेको बताए।

खुट्टा छिनालिएका विकलाई उपचारका लागि भारतको लखनउ लगिएको छ। घाइते विकलाई तत्कालै तुलसीपुरस्थित राप्ती प्रादेशिक अस्पताल लगिएको थियो। त्यहाँ उपचार हुन नसकेपछि नेपालगन्ज रिफर गरिएको थियो। त्यहाँ पनि उपचार हुननसकेपछि भारत लगिएको जिल्ला प्रहरी कार्यालय, बाँकेले जनाएको छ।