विश्वकप लिग-२ को पहिलो सिरिज नेपालमा हुने

काठमाडौं, मंसिर १५ : सन् २०२७ को आईसिसी एकदिवसीय विश्वकप छनोटका रुपमा रहेको विश्वकप लिग-२ को पहलो सिरिज नेपालमा आयोजना हुने भएको छ।

सिरिज आगामी फागुन ५ गतेबाट सुरु हुने नेपाल क्रिकेट संघ (क्यान)ले जनाएको छ। जसमा २ बलिया टिम नेदरल्यान्ड्स र स्कटल्यान्डसँग नेपालले खेल्नेछ।

स्कटल्यान्ड लिग-२को पहिलो संस्करणको विजेता हो भने नेदरल्यान्ड सुपर लिगबाट लिग २मा झरेको हो। अघिल्लो संस्करणको लिग-२को अन्तिम त्रिकोणात्मक सिरिज पनि नेपालमै भएको थियो।

अघिल्लो पटक ७ टिम सहभागी लिग २मा अब ८ टिम हुनेछन्। जसमा स्कटल्याण्ड, ओमान, नेपाल, नामिबिया र अमेरिका लिग-२ मै कायम थिए भने क्यानडा र युएयई छनोटबाट आएका छन्। यता, विश्वकप खेलेको नेदरल्यान्ड्स सुपर लिगबाट झरेको हो।