बेथानचोकद्वारा तेक्वान्दो खेलाडी सम्मानित

काभ्रे, कात्तिक २४ : बंगलादेशमा आयोजित प्रथम बंगबन्धु अन्तर्राष्ट्रिय खुल्ला तेक्वान्दो प्रतियोगितामा व्यक्तिगततर्फसमेत गरी प्रतियोगितामा दुई ओटा पदक जित्ने बेथानचोकका विष्णु खत्रीलाई गाउँपालिकाले नगद र प्रशंसा पत्र प्रदान गर्दै सम्मान गरेको छ।

गाउँपालिकाले एक कार्यक्रमबीच खत्रीलाई नगद ५० हजार र प्रशंसा पत्र प्रदान गर्दै सम्मान गरेको हो। बेथानचोक–५ भंगालाका खत्रीले नेपालको तर्फबाट प्रतिनिधित्व गरेका थिए।

प्रतियोगितामा उनले पुम्सेमा रजत पदक जितेका थिए भने टिम पुम्सेमा उनको टिमले कास्य जितेको थियो।

कार्यक्रमलाई सम्बोधन गर्दै गाउँपालिका अध्यक्ष भगवान अधिकारीले विश्वस्तरको प्रदर्शन गर्दै गाउँपालिकाको मात्र नभई देशकै गरिमा बढाउनु भएकोमा खत्रीलाई धन्यवाद व्यक्त गर्दै उज्ज्वल खेल जीवनको कामना गरे।

यस्तै उपाध्यक्ष तारा राना तिमल्सिनाले खेलकुदको विकासका लागि गाउँपालिकाले लगानी गर्दै आइरहेको र प्रतिभा उत्पादन र प्रोत्साहनका गतिविधि गर्दै जाने बताए। कायृक्रममा वडा अध्यक्षहरू १ देखि ६ सम्म क्रमशः मधुसुधन तिमल्सिना, पुरुषोत्तम तिमल्सिना, कुवेर ढकाल, कृष्ण बहादुर लामा, राजकुमार वाइबा तथा विष्णु तामाङले पदकधारी खेलाडी खत्रीलाई बधाई दिए।

सम्मान पश्चात कार्यक्रममा सम्मानित खेलाडी खत्रीले सम्मानले आफूलाई थप उर्जा र हौसला मिलेको बताए।