युएईविरुद्ध नेपालकाे ब्याटिङ,  कुशल भुर्तेलको अर्धशतक

काठमाडौं, कात्तिक १० : त्रिकोणात्मक टी २० आई सिरिजको फाइनलमा नेपालले यूएईविरुद्ध पहिले ब्याटिङ गरिरहेकाे छ। यूएईले टस जितेपछि फिल्डिङ रोज्दै नेपाललाई पहिले ब्याटिङको निम्तो दिएको हो।

कीर्तिपुरस्थित त्रिवि अन्तर्राष्ट्रिय क्रिकेट मैदानमा जारी खेलमा  कुशल भुर्तेलले यूएईविरुद्ध अर्धशतक बनाएका छन्। भुर्तेलले २८ बलमा ३ छक्का र ६ चौका मद्दतमा ५० रन बनाएका हुन्। अर्धशतक बनाएपछि एक बलको सामना गरेका उनी थप रन नजोडी आउट भए।

यसअघि लिग चरणका सबै खेल मुलपानी क्रिकेट मैदानमा खेलाइएको थियो। हङकङसमेत सहभागी सिरिजमा नेपाल र युएई शीर्ष दुईमा परेसँगै फाइनलमा उपाधिकालागि प्रतिस्पर्धा गरिरहेका छन्। 

डबल राउण्ड रोविनका आधारमा भएको सिरिजमा नेपाल अपराजित रहँदै फाइनल पुगेको हो। यसअघि भएका ४ खेल मध्ये नेपालले युएई र हङकङलाई दुईदुई खेलमा पराजित गरेको थियो। युएई र हङकङले समान एक खेल जिते पनि नेट रनरेटको आधारमा युएई दोस्रो भएर फाइनल पुगेको हो।