अफगानिस्तानलाई हराउँदै न्युजिल्यान्ड विश्वकपको शीर्ष स्थानमा

काठमाडौं, कात्तिक २ : लगातार चौथो जित निकाल्दै न्युजिल्याण्ड भारतमा जारी एकदिवसीय विश्वकप क्रिकेटको शीर्षस्थानमा उक्लिएको छ।

लगातार चौथो जित निकाल्ने क्रममा गएराति न्युजिल्यान्डले अफगानिस्तानलाई १४९ रनको फराकिलो अन्तरले हरायो। यसअघि उसले इंग्ल्यान्डलाई ९ विकेटले, नेदरल्यान्ड्सलाई ९९ तथा बंगलादेशलाई ८ विकेटले हराएको थियो।

न्युजिल्याण्डले दिएको २८९ रनको लक्ष्य पछ्याएको अफगानिस्तान ३४.४ ओभरमा १३९ रनमै अलआउट भयो। उसका रहमात शाहले ६२ बलमा १ चौकासहित सर्वाधिक ३६ रन बनाए। आजमतुल्लाह ओमरजाई २७ रन बनाउनु बाहेक उल्लेख्य योगदान दिन सकेनन्।

न्युजिल्यान्डका मिचेल सान्टनार र लोकी फर्गुसनले समान ३ विकेट लिँदा ट्रेन्ट बोल्टको नाममा २ विकेट रह्यो। 

चेन्नइमा टस हारेर पहिला ब्याटिङ गरेको न्युजिल्यान्डले निर्धारित ५० ओभरमा ६ विकेटको क्षतिमा २८८ रन बनायो। उसका ग्लेन फिलिप्सले सर्वाधिक ७१ रन बनाए। उनले ८० बलमा ४ चौका र ४ छक्का प्रहार गरे।

त्यस्तै कप्तान टम लाथमले ७४ बलमा ३ चौका र २ छक्काको मद्दतमा ६८ रन बनाए भन् विल योङले ६४ बलमा ४ चौका र ३ छक्का प्रहार गर्दै ५४ रन बनाए। 

अफगानिस्तानका अजमतुल्लाह ओमरजाई र नवीन उल हकले समान  २ विकेट लिए। 

४ जित निकालेको न्युजिल्यान्ड ८ अंकसहित शीर्ष स्थानमा छ भने भारत ३ खेलमा ३ जित निकाल्दै दोस्रो स्थानमा छ। अफगानिस्तानको भने २ अंक मात्र छ।