आगामी आवदेखि कामपाको सबै सेवा अनलाइन प्रणालीमार्फत

काठमाडौं, असार १०ः काठमाडौं महानगरपालिकले आगामाी आर्थिक वर्षदेखि सबै सेवा अनलाइन प्रणालीमार्फत प्रदान गर्ने भएको छ । त्यसका लागि कामपाले १५ करोड बजेट विनियोजना गरेको आज आगामी आर्थिक वर्ष २०८०र८१ को बजेट प्रस्तुत गर्दै कामपाको उपप्रमुख  सुनिता डङ्गोलले जानकारी दिइन् ।

‘सुशासनका लागि अनलाइन सेवा’ भन्ने नाराका साथ उक्त कार्यक्रम सञ्चालन गर्न लागिएको पनि  उपप्रमुख  सुनिता डङ्गोलले जानकारी दिइन् । त्यसैगरी, ‘महानगरले देख्छ’ योजनालाई गौरवको आयोजनाका रुपमा विकास गरी त्यसका लागि २० करोड विनियोजन गरिएको छ ।  कामपाले आफ्नै टेलिभिजन पनि सञ्चालनमा ल्याउने भएको छ । उक्त विषयलाई आगामी आवको बजेटमा नै समावेश गरिएको छ । टेलिभिजन स्थापनाका लागि महानगरले पाँच करोड विनियोजन गरेको छ ।   

त्यसैगरी, कामपाले  एक टोल एक खेलकुद पूर्वाधार कार्यक्रम सञ्चालन गर्ने भएको छ । त्यसका लागि १० करोड ५० लाख विनियोजन गरिएको छ । २५ अर्ब ५४ करोडको कूल बजेट ल्याएको कामपाले विगतका वर्षमा जस्तै यस वर्ष पनि भौतिक पूर्वाधार क्षेत्रमा सबैभन्दा बढी सात अर्ब ३४ करोड बजेट विनियोजन गरेको छ । शिक्षामा एक अर्ब ३२ करोड  र स्वास्थ्यमा ९२ करोड ६६ लाख बजेट विनियोजन गरिएको छ ।   

शिक्षामा एक अर्बभन्दा बढी

आगामी आर्थिक वर्षदेखि काठमाडौँ महानगरपालिकाको ८९ वटै सामुदायिक विद्यालयमा अध्यापन गराउने शिक्षकलाई मासिक रुपमा तलब उपलब्ध गराउने भएको छ । त्यसका लागि कामपाले त्यसका लागि रु ३० करोडको सोध भर्ना कोष खडा उपप्रमुख डङ्गोलले जानकारी दिइन् । हाल सामुदायिक विद्यालयका शिक्षकहरुले चौमासिक रुपमा तलब पाउँदै आएका थिए । ‘गरिखाने शिक्षा, महानगरको इच्छा’ कार्यक्रमका लागि ५० करोड रुपैयाँ खर्च गरिनेछ । 

करार कर्मचारी राख्न ३० करोड

त्यसैगरी, कामपाले आगामी आर्थिक वर्ष ३०० कुचिकार, २६९ स्वास्थ्यकर्मी, १५१ नगर प्रहरी जवान, ५१ कार्यालय सहयोगी र ३२ जना चौकीदार करारमा राख्ने उपप्रमुख डंगोलले जानकारी दिइन् । यी जनशक्ति करारमा राख्न महानगरपालिकाले ३० करोड विनियोजन गरेको छ । 

‘मेरो सहर हरित सहर’ कार्यक्रमका लागि ५० करोड विनियोजन गरिएको छ । जसअन्तर्गत उद्यान, आइल्यान्डको निर्माण मर्मत सम्भार र वृक्षरोपण कार्य अभियानका रुपमा सञ्चालन गरिनेछ ।