कोशीदेखि गण्डकी प्रदेशसम्म वर्षा, पश्चिम तराईमा अत्यधिक गर्मी कायमै

काठमाडौं, जेठ ३१ : कोशी र मधेस प्रदेशका थोरै स्थानमा मेघगर्जन, चट्याङ्सहित हल्कादेखि मध्यम वर्षा भइरहेको छ ।

जल तथा मौसम विज्ञान विभागको मौसम पूर्वानुमान महाशाखाकाअनुसार हाल देशमा पश्चिमी वायुका साथै भारतको बिहारमा रहेको न्यून चापीय प्रणालीको आंशिक प्रभाव रहेको छ । मंगलबार राति काठमाडौं उपत्यकासहित देशका पूर्वी पहाडी तथा तराईमा वर्षा भएको छ । वर्षासँगै अत्यधिक गर्मीबाट राहत महसुस गरिएको छ ।

आज दिउँसो आंशिकदेखि सामान्य बदली भई कोशी, बागमती र गण्डकी प्रदेशका केही स्थान र मधेस प्रदेशलगायत बाँकी पहाडी भूभागका थोरै स्थानमा मेघगर्जन, चट्याङ्सहित हल्कादेखि मध्यम वर्षाको सम्भावना छ ।

राति कोशी प्रदेशलगायत बागमती र गण्डकी प्रदेशको पहाडी भू भागका केही स्थानमा मेघगर्जन चट्याङ्सहित हल्कादेखि मध्यम वर्षा हुनेछ । साथै मधेस प्रदेशलगायत बाँकी पहाडी भूभागका एक,दुई स्थानमा क्षणिक वा हल्का वर्षाको सम्भावना रहेको महाशाखाले जनाएको छ।

महाशाखाकाअनुसार शुक्रबार पनि कोशी, मधेस, बागमती र गण्डकी प्रदेशका केही स्थानमा र बाँकी पहाडी भूभागका थौरै स्थानमा वर्षाको सम्भावना छ ।

कोशीदेखि गण्डकी प्रदेशसम्म वर्षाको सम्भावना रहेपनि पश्चिम तराई र पहाडी भूभागमा भने वर्षाको सम्भावना छैन । जसका कारण देशका मध्य तथा पश्चिम तराईमा अत्यधिक गर्मी यथावत रहने महाशाखाले जनाएको छ ।

महाशाखाले नेपालमा आज वा भोलिसम्ममा मनसुन भित्रने पूर्वानुमान गरेको छ ।