१५ बुँदे मागसहित कांग्रेस सांसद गौतम आमरण अनशनमा

काठमाडौं, वैशाख ३१ : सत्तारुढ नेपाली कांग्रेसका सांसद एवम् पूर्वमन्त्री सञ्जय गौतमले आमरण अनशन सुरु गरेका छन् । 

नेपाली कांग्रेसका केन्द्रीय सदस्य समेत रहेका गौतम १५ सुत्रीय माग राख्दै शनिबार बेलुकीबाट जब्दीघाटको भत्किएको पुल मुनि टेन्ट लगाएर आमरण अनशनमा सुरु गरेका हुन् । बबई नदीको जब्दीघाटमा नयाँ पुल निर्माण, भासिएको पुलको स्पान हटाउनु पर्ने, बबई नदी तटबन्ध र बबई सिंचाई आयोजनामा बजेट कटौतीले चुनौती थपिएको लगायत मागसहित उनी अनशन बसेका हुन् । 

सदरमुकाम गुलरिया र बारबर्दिया नगरपालिका जोड्ने जब्दीघाटको पुल बनेर उदघाटन नहुँदै २०७४ साउन अन्तिम साता भत्किएको थियो । यस्तै सांसद गौतमले जिल्ला सदरमुकाम डुबान र कटानको कारण जोखिममा रहेको भन्दै तटबन्धनका काम गर्नुपर्ने, सिँचाइ आयोजनाहरुमा बजेट सुनिश्चित हुनुपर्ने लगायतका माग पनि राखेका छन् । 

गौतम बर्दिया क्षेत्र नं १ बाट प्रतिनिधि सभामा निर्वाचित भएका थिए ।