९ महिनामा ९ खर्ब रूपैयाँ रेमिट्यान्स नेपाल भित्रियो

काठमाडाैं, वैशाख २७ः चालु आर्थिक वर्ष २०७९/८० को सुरूवाती ९ महिनामा रेमिट्यान्समा उल्लेख्य सुधार देखिएको छ । 

नेपाल राष्ट्र बैंकका अनुसार चैत मसान्तसम्ममा देश भित्रिएको रेमिट्यान्समा २४.२ प्रतिशतले बढेर नौ खर्ब तीन अर्ब ३९ करोड पुगेको हो । गत आर्थिक वर्षको सोही अवधिमा रेमिट्यान्स शून्य दशमलव दुई प्रतिशतले घटेको थियो ।
    
गत चैत सम्ममा नेपालले प्राप्त गरेको रेमिट्यान्स ६ अर्ब ९२ करोड अमेरिकी डलर बराबर हो । अमेरिकी डलरमा विप्रेषण आप्रवाह वृद्धिदर १३.९ प्रतिशतले बढेको राष्ट्र बैंकले जनाएको छ । 

यस्तै, चालु आर्थिक वर्षको चैत मसान्तसम्ममा वैदेशिक रोजगारीका लागि अन्तिम श्रम स्वीकृति लिने नेपालीको संख्या ५१५ प्रतिशतले बढेर ३ तीन लाख ८७ हजार आठ सय ३९ पुगेको छ ।
  
त्यसैगरी, वैदेशिक रोजगारीका लागि पुनः श्रम स्वीकृति लिने नेपालीको सङ्ख्या यो अवधिमा ५.५ प्रतिशतले बढेर दुई लाख १७ हजार नौ सय ५९ पुगेको छ । अघिल्लो वर्षको सोही अवधिमा यो संख्या १९९.९ प्रतिशतले बढेको थियो ।