नवनियुक्त स्वास्थ्यमन्त्री बस्नेतले पदबहालीसँगै केके गरे चार निर्णय?

काठमाडौं, वैशाख २१ : नवनियुक्त स्वास्थ्य तथा जनसंख्यामन्त्री मोहनबहादुर बस्नेतले स्वास्थ्य उपचार विशेष कार्यक्रम सञ्चालन गर्ने निर्णय गरेका छन् ।

आज (बिहीबार)  पदभार ग्रहणपछि मन्त्री बस्नेतले नियमित सेवाका अलावा कोरोना, डेंगुलगायत सरुवा रोग फैलिन नदिन मन्त्रालयले नीतिगत नेतृत्व गर्नुका साथै संघ, प्रदेश र स्थानीय तहका साथै दातृ निकायको समन्वयमा स्वास्थ्य उपचार विशेष कार्यक्रम सञ्चालन गर्ने निर्णय गरेका हुन्।

उनले स्वास्थ्य बिमा कार्यक्रम सर्वसाधारण नागरिकसमेतको सहज पहुँच र सुविधाका लागि सरलीकृत गर्न आवश्यक भएकालेदातृ निकायको समेत सहभागितामा सो सेवालाई थप व्यवस्थित, प्रभावकारी र विश्वसनीय बनाउने निर्णय पनि गरेका छन्।

प्रदेश र स्थानीय तहहरूमा साधन, स्रोत, स्वास्थ्य उपकरण र सेवासुविधासहित चिकित्सकहरुलाई अधिकतम परिचालन गर्ने निर्णय पनि उनले गरे। 

अस्पतालहरुबाट दिइँदै आएको उपचार सेवा र उपलब्ध साधनस्रोतको अधिकतम उपयोग भएनभएको अनुगमन गर्न अतिरिक्त स्वास्थ्य सचिवको नेतृत्वमा अनुगमन समिति बनाउने निर्णय पनि उनले गरेका छन्।