‘अयोग्य लडाकुलाई रकम दिने व्यवस्था विष्णु पौडेल अर्थमन्त्री हुँदै ल्याइएको हाे’

काठमाडौं, वैशाख १५ : माओवादी केन्द्रका सांसद माधव सापकोटाले अनमिनले अयोग्य ठहर गरेका लडाकूहरुलाई २ लाख रुपैयाँ दिने व्यवस्था एमालेका विष्णु पौडेल अर्थमन्त्री हुँदा ल्याएको बजेटमा गरिएको स्पष्ट पारेका छन्।

शुक्रबार प्रतिनिधिसभा बैठकमा बाेल्दै उनले २०७३/७४ मा तत्कालीन अर्थमन्त्री साे व्यवस्था ल्याउँदा सर्वोच्च अदालतमा मुद्दा परेपछि रोकिएको विषय अहिले अदालतकै आदेशअनुसार अगाडि बढाइएको जिकिर गरे।

'माननीय विष्णु पौडेलकै नेतत्वमा ल्याइएको बजेट वक्तव्य र अदालतको आदेशअनुसार अहिले सरकारले खाली कार्यविधि मात्र विकास गर्न खोजेको हो,’ उनले भने, 'हावाको भरमा अरुलाई दोषारोपण नगर्न र सदनलाई भ्रमित नबनाउन आग्रह गर्दछु।'

सांसद सापकोटाले यो व्यवस्था लडाकूहरुले लडेर ल्याएको बताउँदै व्यवस्था परिर्वतनका लागि बलिदान गर्न तयार भएकालाई २ लाख पैसाका लागि अपमान गर्न नमिल्ने संकेत उनले गरे।