उपनिर्वाचन हुने तीन जिल्लामा भोलिदेखि आचार संहिता लागु हुने, सरकार विस्तारमा बाधा नपर्ने
निर्वाचन आयोगले चितवन, बारा र तनहुँमा मन्त्रीहरु, संवैधानिक निकायका पदाधिकारी, स्थानीय कार्यपालिकाका सदस्यलगायतका लागि निर्वाचन आचारसंहिता लागु गर्ने निर्णय गरेको हो।
काठमाडौं, चैत २३ : उपनिर्वाचन हुने तीन जिल्लामा भोलि (शुक्रबार) देखि निर्वाचन आचार संहिता लागु हुने भएको छ।
निर्वाचन आयोगले चितवन, बारा र तनहुँमा मन्त्रीहरु, संवैधानिक निकायका पदाधिकारी, स्थानीय कार्यपालिकाका सदस्यलगायतका लागि निर्वाचन आचारसंहिता लागु गर्ने निर्णय गरेको हो।
तर निर्वाचन आचारसंहिताका कारण सरकार निर्माण र विस्तार प्रभावित नहुने आयोगका प्रवक्ता शालिग्राम शर्मा पौडेलले बताए। आचार संहिता वैशाख १० मा उपनिर्वाचन हुने तीन क्षेत्र चितवन-२, बारा-२ र तनहुँ-१ मा मात्र लागु हुने उनको भनाइ छ।
पौडेलका अनुसार निर्वाचन हुने तीन जिल्लाभर मात्रै आचारसंहिताविपरीतका गतिविधि गर्न पाइन्न। यसअघि राष्ट्रपति र उपराष्ट्रपति निर्वाचनका लागि जारी भएको आचारसंहिताका कारण सरकार विस्तार लगायतका कतिपय काम प्रभावित भएका थिए।
आचारसंहिता अवधि सकिएलगत्तै चैत ६ मा प्रधानमन्त्री पुष्पकमल दाहालले विश्वासको मत लिए पनि मन्त्रिपरिषद्ले पूर्णता पाइसकेको छैन।
