सुदूरपश्चिमका मुख्यमन्त्री शाहलाई एमालेले विश्वासको मत नदिने, माओवादी छलफल गर्दै 

काठमाडौं, फागुन २१ : नेकपा एमालेले सुदूरपश्चिम प्रदेशका मुख्यमन्त्री कमलबहादुर शाहलाई विश्वासको मत नदिने भएको छ । एमालेको आज बसेको प्रदेश संसदीय दलको बैठकले मुख्यमन्त्री शाहलाई विश्वासको मत नदिने निर्णय गरेको हो । 

यसअघि माघ २६ गते एमालेका राजेन्द्र रावल नेतृत्वको सरकार ढलेपछि कांग्रेसका शाह मुख्यमन्त्री नियुक्त भएका थिए । उनले आइतबार विश्वासको मत लिने तयारी गरेका छन् ।

केन्द्रमा ८ दलीय गठबन्धन भएपनि प्रदेशमा गठबन्धनकै घटकहरुबीच सहमति जुट्न नसक्दा मुख्यमन्त्री शाह संकटमा परेका छन् । प्रदेशमा निर्णायक रहेको नागरिक उन्मुक्ति पार्टीले शक्ति बाँडफाँटमा लिखित सहमति मागेको छ । 

गठबन्धनको प्रमुख घटक नेकपा माअ‍ोवादी केन्द्रले पनि शक्ति बाँडफाँटमा लिखित सहमति मागेको छ । उसले मुख्यमन्त्री समेत आलोपालो चलाउनुपर्ने माग गरेको छ । माओवादीको प्रदेश कमिटीले अध्यक्ष पुष्पकमल दाहाललाई पनि प्रदेशको अवस्थााबारे जानकारी गराएको थियो । 

हिजो बसको माओवादी केन्द्रको प्रदेश संसदीय दलको बैठकमा केही सांसदहरुले वर्तमान सरकारलाई विश्वासको मत दिनुपर्ने मत राखेका थिए । माओवादीले आज त्यसबारेमा निर्णय गर्न पुनः संसदीय दलको बैठक बोलाएको छ । 

सुदूरपश्चिम प्रदेशसभामा कांग्रेसको १९, माओवादीको ११, एमालेको १०, नागरिक उन्मुक्तिको ७, एकीकृत समाजवादीको ४, राप्रपाको १ र एक स्वतन्त्र सांसद छन् ।