राष्ट्रपतिमा नेम्वाङलाई भोट माग्न एकीकृत समाजवादीको पार्टी कार्यालय पुगे एमाले नेताहरु 

काठमाडौं, फागुन १८ : नेकपा एमालेका नेताहरुले नेकपा एकीकृत समाजवादीका अध्यक्ष माधवकुमार नेपालसँग भेटवार्ता गरेका छन् ।

एकीकृत समाजवादीको आलोकनगस्थित पार्टी कार्यालयमा पुगेर नेताहरुले अध्यक्ष नेपाललाई भेटेका हुन् । भेटमा राष्ट्रपति निर्वाचनका विषयमा छलफल भएको बताइएको छ । 

फागुन २५ गते हुने राष्ट्रपतिको निर्वाचनका लागि एमालेले सुवास नेम्वाङलाई उम्मेदवार बनाएको छ । राष्ट्रपतिका उम्मेदवार रहेका एमाले उपाध्यक्ष नेम्वाङ, अर्का उपाध्यक्ष विष्णु पौडेल र उपमहासचिव पृथ्वीसुब्बा गुरुङ माधव नेपाललाई भेट्न पुगेका हुन् । 

माधव नेपाल नेतृत्वको एकीकृत समाजवादीले भने राष्ट्रपति पदमा कांग्रेसका उम्मेदवार रामचन्द्र पौडेललाई मत दिने औपचारिक निर्णय गरिसकेको छ ।