नामकरण भएको उपलक्ष्यमा आज कोशी प्रदेशमा सार्वजनिक बिदा

काठमाडौं, फागुन १८ : कोशी प्रदेश सरकारले आज सार्वजनिक बिदा दिएको छ । 

बुधबार साँझ बसेको मन्त्रिपरिषद् बैठकले प्रदेश नं १ को नामाकरण भएको उपलक्ष्यमा सार्वजनिक बिदा दिने निर्णय गरेको प्रदेशको आन्तरिक मामिला तथा कानुन मन्त्रालयले जानकारी दिएको हो । बुधबार प्रदेश १ ले आफ्नो प्रदेशको नाम कोशी राखेको छ। 

बुधबार बसेको प्रदेश सभा बैठकले सो प्रदेशको नाम कोशी प्रदेश हुने टुंगो लगाएको हो । एमालेका सांसद रामबहादुर राना मगरले प्रस्ताव गरेको कोशी प्रदेशमा आवश्यक दुई तिहाइ मत जुटेपछि सोही नाम पारित भएको हो। 

एमालेको सो प्रस्तावलाई कांग्रेस र माओवादी केन्द्रले समेत साथ दिएका थिए।