प्रदेश नं १ अब 'कोशी प्रदेश', दुई तिहाइबाट पारित 

काठमाडौं, फागुन १७ : प्रदेश १ को नाम कोशी कायम भएको छ । 

प्रदेश सभाको आज बसेको बैठकको दुई तिहाइ बहुमतबाट कोशी नाम पारित भएको हो । प्रदेशको नाम कोशी राख्न एमालेका सांसद रामबहादुर मगरले प्रस्ताव गरेका थिए । 

उक्त प्रस्तावमा मत विभाजन हुँदा पक्षमा ८२ विपक्षमा चार मत परेको हो । यो प्रक्रियामा ६ जना सांसद अनुपस्थित थिए । कोशीको पक्षमा कांग्रेस र एमाले समेत एकमत थिए । राप्रपाले पनि कोशीलार्इ समर्थन गरेको थियो । 

यसअघि नाम संशोधनका लागि दिइएको दुई घण्टाको समयमा कमलप्रसाद जबेगु र राजेन्द्र राईले संशोधन दर्ता गरेका थिए ।  

पहिचानको आधारमा नाम राख्नुपर्ने मागसहित प्रदेशसभामा राईले किराँत–लिम्बुवान–सगरमाथा नाम दर्ता गराएका थिए । सभाले राईको प्रस्ताव बहुमतले अस्वीकृत गरेको थियो ।