कांग्रेस नेता भण्डारीको स्वास्थ्यमा सुधार, ठाेस खाना खान र बाेल्न थाले

काठमाडौं, माघ १३ : नेपाली कांग्रेसका नेता एवं सांसद डा. चन्द्रकान्त भण्डारीको स्वास्थ्यमा सुधार आएको छ।

काठमाडौंको बुद्धनगरस्थित आफ्नै घरमा १० दिन पहिले ग्यास चुहिएर विष्फोट हुँदा घाइते भएका डा.भण्डारीको मुम्बईमा उपचार भइरहेको छ।

भारतको नेशनल वर्न सेन्टर मुम्बईमा उपचार गराइरहेका भण्डारीको शरीरको तापक्रम, धडकन गति, श्वासप्रश्वासको दर, रक्तचाप सबै सामान्य अवस्थामा रहेको भण्डारीका आफन्त मीनप्रसाद भण्डारीले जानकारी दिए।

भण्डारीको आज ड्रेसिङ गरिने भएको छ। भण्डारीले शुक्रबारबाट ठोस खाना खान र बोल्न सुरु गरेका थिए।

गत फागुन ३ गते राति आफ्नो निवासमा ग्यास सिलिन्डर चुहिएर सांसद भण्डारीसहित उहाँकी आमा हरिकला भण्डारी घाइते हुनुभएको थियो । घटनालगत्तै दुवै जनाको कीर्तिपुरस्थित कीर्तिपुर बर्न अस्पतालमा उपचार गरिएको थियो।

आमा हरिकलाको भने उपचारका क्रममा फागुन ४ गते बिहान निधन भएको थियो भने सांसद भण्डारीलाई थप उपचारका लागि सोही दिन भारत लगिएको थियो।