गठबन्धन परिवर्तन गर्ने निष्कर्षमा पुगेका छैनौं : नारायणकाजी श्रेष्ठ 

काठमाडौं, फागुन ११ : नेकपा माओवादी केन्द्रका वरिष्ठ उपाध्यक्ष तथा उपप्रधान एवम् भौतिक पूर्वाधार तथा यातायात मन्त्री नारायणकाजी श्रेष्ठले गठबन्धन परिवर्तन गर्ने निष्कर्षमा नपुगेको बताएका छन् । 

बिहीबार नेकपा एकीकृत समाजवादीका अध्यक्ष माधवकुमार नेपालसहितका नेताहरुसँगको भेटवार्तापछि पत्रकारहरुसँगको कुराकानीमा श्रेष्ठले राष्ट्रपतिको सेरोफेरोमा छलफल भइरहेको तर, तत्काल गठबन्धन परिवर्तन गर्ने निष्कर्षमा पुगिनहालेको बताएका हुन् ।

उनले आजै फेरि छलफल गर्नेगरी भेटवार्ता सकिएको जानकारी दिए। 

श्रेष्ठले राष्ट्रपतिको विषयमा कांग्रेस, एमालेसहित सबै दलहरुसँग प्रधानमन्त्री तथा पार्टीका अध्यक्ष पुष्पकमल दाहाल ‘प्रचण्ड’ले भेटवार्ता र छलफल गरिरहेको बताउँदै सहमतिबाटै राष्ट्रपतिको उम्मेदवार टुंगो लगाउने पक्षमा रहेको बताए। 

‘सबै पार्टीसँग छलफल गरेर एउटा निष्कर्षमा पुग्ने कुरा हो । तर, हामी गठबन्धन परिवर्तन गर्ने भनेर निष्कर्षमा पुगिसकेका छैनौं,’ उनले भने ।