स्पट फिक्सिङको आरोपमा पक्राउ परेका तीनै खेलाडीलाई धरौटीमा छाड्न काठमाडाैं जिल्ला अदालतकाे आदेश

काठमाडाैं, फागुन १० :  जिल्ला अदालत काठमाडौंले स्पट फिक्सिङको आरोपमा पक्राउ परेका तीन जना खेलाडीलाई धरौटीमा छाड्न आदेश दिएको छ । बुधबार भएको थुनछेक बहसपछि महबुब आलम, मोहम्मद आदिल अन्सारी र नितेश गुप्तालाई धराैटीमा छाड्न आदेश दिएकाे हाे।

न्यायाधीश राजेन्द्रकुमार श्रेष्ठको एकल इजलासले ३ लाख रुपैयाँ धरौटीमा छाड्ने आदेश दिएको जिल्ला सरकारी वकिल कार्यालयका प्रमुख अच्युतमणि नेपाउनेले जानकारी दिए ।

९ देखि २७ पुसमा काठमाडौंको कीर्तिपुरमा भएको नेपाल टी-२० प्रतियोगितामा स्पट फिक्सिङ भएको आशंकामा नेपाल प्रहरीको केन्द्रीय अनुसन्धान ब्यूरो (सीआईबी) ले अनुसन्धान सुरु गरेको थियो । त्यस क्रममा प्रहरीले आलम, आदिल अन्सारी र नितेश गुप्तालाई पक्राउ गरेको थियो । प्रहरीले फिक्सिङमा संलग्न भएको दाबी गरेको नवीन कँडेल र रवि माझी भने फरार छन् ।