राष्ट्रपति निर्वाचनबारे अन्तिम निर्णय गर्ने अधिकार अध्यक्ष प्रचण्डलाई 

काठमाडौं, फागुन ८ : नेकपा माअ‍ोवादी केन्द्रले राष्ट्रपतिको उम्मेदवारबारे निर्णय गर्ने अधिकार पार्टीका अध्यक्ष पुष्पकमल दाहाल ‘प्रचण्ड’लाई दिएको छ । 

सोमबार साँझ बसेको पदाधिकारी बैठकले अध्यक्ष प्रचण्डलाई राष्ट्रपतिबारे अन्तिम निर्णय गर्ने अधिकार दिने निर्णय गरेको माओवादी केन्द्रका प्रवक्ता कृष्णबहादुर महराले काठमाडौं प्रेसलाई जानकारी दिए । 

साथै बैठकले राष्ट्रपतिमा राष्ट्रिय सहमति खोज्ने निर्णय पनि गरेको छ । ‘राष्ट्रपतिको निर्वाचनमा पार्टीले के कदम चाल्ने भन्ने विषयको निर्णय गर्ने अधिकार अध्यक्षलाई दिने निर्णय गरेका छौं,’ प्रवक्ता महराले भने । 

उनले गणतन्त्र, संघीयता र संविधानको रक्षा नै पार्टीको स्वार्थ रहेकाले सो अनुसार कदम चालिने बताए ।  ‘गणतन्त्रको रक्षा, संविधानको रक्षा र शान्ति प्रक्रिया पूरा गर्ने हाम्रो स्वार्थ हो, यही स्वार्थमा केन्द्रीत रहेर राष्ट्रपतिमा राष्ट्रिय सहमति खोजी गर्ने निर्णय भएको छ,’ उनले भने । 

बैठकमा अधिकांश पदाधिकारीहरुले वर्तमान परिस्थिती बदलिएको र नयाँ ढंगले सोचेर अगाडि बढ्न अध्यक्ष प्रचण्डलाई सुझाव दिएको पनि प्रवक्ता महराले बताए । ‘ सहमति आफ्नो ठाउँमा छ, तर बदलिएको परिस्थितीमा देशको हित हुनेगरी निर्णय गर्न अध्यक्ष ज्यूलाई भनेका छौं, त्यसमा उहाँ पनि सकारात्मक देखिनुभएको छ,’ प्रवक्ता महराले भने,‘ के हुँदै जान्छ हेरौंला।’