राष्ट्रपति उम्मेदवारबारे निर्णय गर्न माओवादी केन्द्रको बैठक सुरु

काठमाडौं, फागुन ८ : नेकपा माअ‍ोवादी केन्द्रको पदाधिकारी बैठक सुरु भएको छ ।

पार्टी केन्द्रीय कार्यालय पेरिसडाँडामा केहीबेरअघि बैठक सुरु भएको हो । 

आजको बैठकमा अध्यक्ष पुष्पकमल दाहाल ‘प्रचण्ड’ले राष्ट्रपतिको उम्मेदवारबारे कांग्रेस र एमालेसँग भएको कुराकानीको ब्रिफिङ गर्नेछन् । 

बैठकबाट माओवादी केन्द्रले राष्ट्रपतिको उम्मेदवारबारे पार्टीको आधिकारिक धारणा सार्वजनिक गर्न सक्ने पनि बताइएको छ । 

सत्ता गठबन्धनको प्रमुख घटक नेकपा एमालेले सरकार गठनअघि भएको सहमतिअनुसार राष्ट्रपति आफ्नो दलबाट हुनुपर्ने बताउँदै आएको छ भने नेपाली कांग्रेसले पनि सरकारलाई विश्वासको मत दिएका कारण राष्ट्रपतिमा सहयोग गर्न आग्रह गर्दै आएको छ । 

राष्ट्रपतिको उम्मेदवारको विषयमा आजै एकीकृत समाजवादीका अध्यक्ष माधवकुमार नेपालले सिंहदरबारमा प्रधानमन्त्री प्रचण्डसँग एक घन्टा भन्दा लामो छलफल गरेका थिए । आइतबार मात्रै नेपाली कांग्रेसका सभापति लगायतका पदाधिकारीको टोलीले प्रधानमन्त्रीसँग भेटवार्ता गरी राष्ट्रपतिमा सहयोग गर्न आग्रह गरेका थिए । कांग्रेसको प्रस्तावमा प्रधानमन्त्री प्रचण्डले सकारात्मक जवाफ दिएका थिए । 

माओवादी अध्यक्ष प्रचण्डले राष्ट्रिय सहमति अनुसार नै राष्ट्रपति बन्ने बताउँदै आएका छन् । राष्ट्रपतिको उम्मेदवारलाई लिएर माओवादी केन्द्रको आजको बैठकलाई निकै चासोका साथ हेरिएको छ ।