पोखरामा यात्रुवाहक बस दुर्घटना, उद्धार कार्य जारी 

काठमाडौं, फागुन ७  ः कास्कीको पोखरामा यात्रुवाहक बस दुर्घटना भएको छ ।

बेगनास तालबाट पोखरातर्फ जाँदै गरेको ग १ ख ६७४७ नम्बरको यात्रुवाहक बस आइतबार दिउँसो दुर्घटनामा परेको हो। 

जिल्ला प्रहरी कार्यालय कास्कीका प्रहरी निरीक्षक ज्ञानबहादुर खड्काका अनुसार पोखरा आउँदै गरेको यात्रुवाहक बस पोखरा महानगरपालिका–२७ स्थित सडकबाट खोल्सामा खसेको हो । 

बसमा ४५ जनाभन्दा बढी यात्रु सवार रहेको बताइएको छ । दुर्घटनामा ठूलो संख्यामा मानिसहरु घाइते भएको आकलन गरिएको छ । 

दुर्घटनास्थलबाट अहिले घाइतेको उद्धार गरी पोखरा स्वास्थ्य विज्ञान प्रतिष्ठानमा उपचारका लागि पठाउने काम भइरहेको प्रहरीले जनाएको छ ।  

दुर्घटनास्थलमा अहिले उद्धारको काम चलिरहेका कारण थप विवरण आउन बाँकी रहेको प्रहरी निरीक्षक खड्काले बताए।