सिंहदरबारमा कांग्रेस संसदीय दलको बैठक जारी 

काठमाडौं, फागुन ५ : नेपाली कांग्रेसको संसदीय दलको बैठक जारी छ । 

शुक्रबार सिंहदरबारस्थित संसदीय दलको कार्यालयमा केहीबेरअघि बैठक सुरु भएको हो । 

कांग्रेसले प्रमुख प्रतिपक्षी दलको सन्दर्भमा सर्वोच्च अदालतमा परेको मुद्दाको विषयमा छलफल गर्न संसदीय दलको बैठक बोलाएको हो । बैठकमा संसदीय दलका सदस्यसहित कानुन व्यवसायीहरु पनि सहभागी छन् । 

कांग्रेस निकट डेमोक्रेटिक लयर्स एसोसियसनका पदाधिकारीसँग परामर्श भइरहेको बताइएको छ । 

कांग्रेसले प्रमुख प्रतिपक्षी दलको मान्यता पाउनुपर्ने दाबी गरिरहेको बेला अधिवक्ता विमल पोखरेलले कांग्रेसलाई प्रमुख विपक्षी दलको मान्यता नदिन माग गर्दै सर्वोच्च अदालतमा रिट दायर गरेका थिए । सो रिटबारे छलफल गर्न सर्वोच्चले दुबै पक्षलाई छलफल बोलाएको छ । 
 
यस विवादमा सर्वोच्चले सभामुख, संघीय संसद सचिवालय, नेपाली कांग्रेसको संसदीय दल, नेता शेरबहादुर देउवा र संवैधानिक परिषदलाई लिखित जवाफ पेश गर्न आदेश दिएको छ । कांग्रेसले कानुन व्यवसायीको रायानुसार जवाफ पेस गर्ने गर्दैछ ।