ग्यास सिलिण्डर विस्फोट हुँदा सांसद चन्द्र भण्डारी र आमा घाइते

काठमाडौं, फागुन ४ : खाना पकाउने ग्यास सिलिण्डर विस्फोट हुँदा सांसद चन्द्र भण्डारी घाइते भएका छन् । 

गएराति आफ्नै घर काठमाण्डौको बुद्धनगरमा ग्यास सिलिण्डर पड्किँदा सांसद भण्डारी र उनकी ८६ वर्षीया आमा घाइते भएको नेपाली कांग्रेसका महामन्त्रीसमेत रहेका सांसद विश्वप्रकाश शर्माले बताए । 

घाइते दुवै जनाको काठमाडौंको कीर्तिपुर अस्पतालमा उपचार भइरहेको छ । नेपाली कांग्रेसका नेता भण्डारी गएको मंसिरमा भएको प्रतिनिधि सभा सदस्य चुनावमा गुल्मीको निर्वाचन क्षेत्र नम्बर १ बाट निर्वाचित भएका थिए ।