सांसद अरुण चौधरीको रिटमा उच्च अदालतले दिएन अन्तरिम आदेश 

काठमाडौं, माघ २३ : नागरिक उन्मुक्ति पार्टीका सांसद अरुणकुमार चौधरीको रिटमा उच्च अदालत दिपायलले अन्तरिम आदेश दिन अस्वीकार गरेको छ ।  

एक दशकअघिको मुद्दामा थुनामा परेका चौधरीले जिल्ला अदालत कैलालीले गरेको फैसलाबारे जानकारी नभएको भन्दै आफ्नो मुद्दामा दिएको म्याद बदर गरी थुनामुक्त गर्न माग गर्दै उच्च अदालतमा रिट दायर गरेका थिए । 

उनले दायर गरेको रिटमा न्यायाधीश अर्जुनप्रसाद कोइरालाको एकल इजलासले अन्तरिम आदेश दिन अस्वीकार गरेको हो । उच्च अदालतले जिल्ला अदालत, जिल्ला सरकारी वकिलको कार्यालय र जिल्ला प्रहरी कार्यालय कैलालको नाममा कारण देखाउ आदेश जारी गरको छ । त्यस्तै अन्तरिम आदेश जारी गर्नुनपर्ने कारण वा प्रमाण भए १५ दिनभित्र अदालतमा उपस्थित हुन पनि आदेश भएको छ । 

उच्च अदालतले सो मुद्दामा अन्तरिम आदेश  जार गर्ने कि नगर्ने भन्ने विषयमा छलफल गर्न माघ २९ गते दुबै पक्षलाई डाकेको छ । 

१३ वर्ष अघिको आगजनी मुद्दामा सांसद चौधरीसहितका तीन जनालाई जिल्ला अदालत कैलालीले ६ महिना कैद र ८ लाख बढी रूपैयाँ क्षतिपूर्ति तिर्न आदेश दिएको थियो ।सोही मुद्दामा प्रहरीले चौधरीलाई केहि दिन अघि बाँकेबाट पक्राउ गरेको थियो । चौधरी हाल कैलाली कारागारमा थुनामा छन् ।