सत्ता गठबन्धनको एकता जसरी पनि जोगाउँछु : प्रधानमन्त्री 

काठमाडौं, माघ २२ : प्रधानमन्त्री पुष्पकमल दाहाल ‘प्रचण्ड’ ले सत्ता गठबन्धनको एकता जुनसुकै हालतमा जोगाउने बताएका छन् । आइतबार संघीय संसद भवनमा पत्रकारहरुसँगको कुराकानीमा प्रधानमन्त्री प्रचण्डले सत्ता साझेदार दलहरुबीचको एकता कुनैपनि हालतमा जोगाउने बताएका हुन् । 

सत्ता साझेदार दल राष्ट्रिय स्वतन्त्र पार्टी सरकारबाट बाहिरिने निर्णय गरेपछि प्रधानमन्त्रीले यस्तो बताएका हुन् । ‘राष्ट्रिय सहमति नै गरौं भनि राखेको छु भने त हाम्रो सत्ता साझेदार बीचको एकतालाई त जसरी पनि बचाउनुपर्छ भन्ने हो मेरो’ उनले भने। 

उनले रास्वपाका सभापति रवि लामिछानेसँग लगातार छलफल भइरहेको पनि बताए । आइतबार बिहान भएको भेटमा पनि लामिछानेले सरकारलाई दिएको समर्थन फिर्ता नलिने तर सरकारबाट बाहिरिने निर्णय हुनसक्ने बताएको प्रधानमन्त्री प्रचण्डले जानकारी दिए।

उनले लामिछानेसँग फेरि संवाद गर्ने पनि बताए ।  भर्खरै सुनेँ। बिहान उहाँसँग भएको कुरा अनुसार सरकारलाई समर्थन फिर्ता चाहिँ होइन मन्त्रीहरु बाहिर निक्लने विषय छलफल भइरहेको छ भन्नुहुन्थ्यो । फेरि हामी छलफल गर्छौं । यसलाई हल गर्नेतिर नै जान्छौं ।’