Kathmandu Press

श्रीमानकाे हत्या आराेपमा पाँच वर्षपछि श्रीमती पक्राउ

श्रीमानकाे हत्या आराेपमा पाँच वर्षपछि श्रीमती पक्राउ

जाजरकाेट , माघ १८ : जाजरकोटमा श्रीमान्‌को हत्या गरेकाे आरोपमा पाँच वर्षपछि श्रीमती र उनका छोरा पक्राउ परेका छन् । भेरी नगरपालिका-६ पुन्मोका ४७ वर्षीया काले कामीको घरायसी झगडापछि हत्या आरोपमा मंगलबार श्रीमती भद्रकला र छोरा तुल्सीरामलाई प्रहरीले पक्राउ गरेको हो ।

२०७४ पुस ३० मा भद्रकलाले लट्ठीले हान्दा काले कामीको मृत्यु भएको र भद्रकला, उनका छोराहरू गोविन्द विक, तुल्सीरामले घर नजिकै शौचालयमा शव पुरिदिएको अनुसन्धानमा खुलेको प्रहरीले जनाएको छ ।

कंकाल पनि शौचालयमा पुरिएको अवस्थामा मंगलबार प्रहरीले फेला पारेको जाजरकोटका डिएसपी सन्तोष निरौलाले जानकारी दिए । उनका अनुसार जिल्ला प्रहरी कार्यालय जाजरकोटबाट अनुसन्धान अधिकृतसहितको प्रहरी टोली घटनास्थलमा पुगेर शौचालयको खाडल उत्खनन गर्दा कामीको कंकाल भेटिएको हो ।

पुरै दाँत सहितको खप्पर (टाउको), प्लास्टिकको डोरीले बाँधिएको ज्याकेट, पाइन्ट र सोही ज्याकेट पाइन्टभित्र मानव कंकाल हड्डीहरू फेला परेको डिएपी निरौलाले बताए । डिएनए परीक्षणका लागि कंकाल विधिविधान प्रयोगशालामा पठाइने प्रहरीले जनाएको छ ।

 अनुसन्धानका लागि पक्राउ परेका उनीहरुलाई जिल्ला प्रहरी कार्यालय जाजरकोटमा राखिएको छ । 

प्रकाशित मिति: १९:०२ बजे, बुधबार, माघ १८, २०७९
NTCNTC
Globle IME bankGloble IME bank
प्रतिक्रिया दिनुहोस्