पोखरा विमान दुर्घटना : थप एकजनाको शव भेटियो, एकको अवस्था अझै अज्ञात 

काठमाडौं, माघ ३ : पोखरामा भएको यती एयरको विमान दुर्घटनामा परि बेपत्ता भएका थप एक जनाको शव भेटिएको छ । विमान दुर्घटनास्थलबाट करिब ७०० मिटर तल सेती नदीमा एकजना महिलाको शव भेटिएको कास्की प्रमुख जिल्ला अधिकारी टेकबहादुर केसीले जानकारी दिएका छन् । 

योसँगै दुर्घटनामा परेका ७१ जनाको शव भेटिएको छ । एकजनाको अवस्था भने अझै अज्ञात रहेको छ । 

बेपत्ताको खोजी गर्न सशस्त्र प्रहरीले गोताखोर परिचालन गरेको छ । सोमबार साँझसम्म शव नभेटिएपछि मंगलबार बिहानैबाट गोताखोर र ड्रोन प्रयोग गरी खोजी कार्य गरिएको थियो ।  

पोखरा महानगरपालिका–१५ मा आइतबार यती एयरलाईन्सको विमान दुर्घटनाग्रस्त भएको थियो ।