राष्ट्रपति भण्डारी साझा बसमा सरर (तस्बिरहरू)
शीतल निवास बसमा चढेकी उनी ललितपुरको पाटन ढोका ओर्लिएकी थिइन्।
काठमाडौं, पुस २३ : राष्ट्रपति विद्यादेवी भण्डारी मदन पुस्तकालयलगायत विभिन्न स्थानको अवलोकन गर्न र पिम्बहालमा आयोजित कार्यक्रममा सहभागी हुन आज (शनिबार) साझा यातायातको विद्युतीय बस चढेर ललितपुर गएकी छन्।
उनलाई लिन साझा बस महाराजगन्जस्थित राष्ट्रपति भवन शीतल निवासमै पुगेको थियो।
शीतल निवास बसमा चढेकी उनी ललितपुरको पाटन ढोका ओर्लिएकी थिइन्। त्यहाँ उनलाई ललितपुर महानगरपालिकाका प्रमुख चिरीबाबु महर्जनले स्वागत गरेका थिए।
राष्ट्रपति भण्डारीले पुस्तकालयमा रहेको हस्तलिखित स्वस्थानी व्रतकथाको समेत अध्ययन गरेकी थिइन्।
पुस्तकालयको अवलोकनपछि राष्ट्रपति भण्डारी हिँडेर अवलोकनका लागि पिम्बहाल पुखु पुगेकी थिइन्। पिम्बहाल मा उनले नेवारी भजन ग्रहणसँगै पिम्बहाल पुखुको इतिहासबारे जानकारी लिएकी थिइन्।
काठमाडौंको रानीपोखरीभन्दा पुरानो पिम्बहाः पुखुको पुरानो नाम जगमदु पुखु हो। पुस्तकालय र पिम्बहाः पुखुको अवलोकनपछि पुनः राष्ट्रपति भण्डारी साझाको विद्युतीय बसमा शीतल निवास फर्केकी छन्।
तस्बिरहरू ः रासस
