बालुवाटारमा सत्ता साझेदार दलहरुको बैठक सुरु

आजको बैठकमा मन्त्रिपरिषद् विस्तार र सत्ता साझेदार दलहरुबीच शक्ति बाँडफाँटबारे छलफल हुने बताइएको छ ।

काठमाडौं, पुस १४ : सत्ता साझेदार दलहरुको बैठक सुरु भएको छ । प्रधानमन्त्रीको सरकारी निवास बालुवाटारमा केहीबेरअघि बैठक सुरु भएको हो ।

आजको बैठकमा मन्त्रिपरिषद् विस्तार र शक्ति बाँडफाँटको विषयमा छलफल हुनेछ । त्यस्तै प्रदेश सरकारको भागबन्डाको विषयमा पनि छलफल हुने बताइएको छ ।

बुधबार नै टुंगो लगाउने भनिएपनि विविध कारणवश बैठक बस्न सकेन । बुधबार एमाले अध्यक्ष केपी शर्मा ओली खुमलटार पुगेर प्रधानमन्त्री पुष्पकमल दाहाल ‘प्रचण्ड’सँग करिब साढे दुई घन्टा छलफल गरेका थिए।

बुधबारको छलफलमा भागबन्डाबारे सामान्य सहमति भइसको बताइएको छ । आजको बैठकले ठोस निर्णय गर्ने बताइएको छ ।

बैठकमा प्रधानमन्त्री प्रचण्डसहित उनलाई समर्थन गर्ने दलहरुको शीर्ष नेताहरु उपस्थित छन् ।

प्रकाशित मिति: ०९:५२ बजे, बिहीबार, पुस १४, २०७९