अग्रजलाई धन्यवाद दिन ‘अजम्बरी उपहार’ सार्वजनिक

काठमाडौं, मंसिर २८ : जीवित नरहेका नेपाली सङ्गीतका स्वर्णिम युगका सङ्गीतकर्मी, गायकगायिकाको अमूल्य योगदानलाई नमन गर्न धन्यवादस्वरूप ‘अजम्बरी उपहार’ बोलको गीत सार्वजनिक गरिएको छ।  

गीतमा स्वर नेपाली आधुनिक गीत र गजल क्षेत्रमा आफ्नो मौलिक पहिचान बनाएका गायक एवं सङ्गीतकार सजल न्यौपानेको रहेको छ। शब्द गीतकार आचार्य प्रभाको रहेको छ। गीतमा शास्त्रीय शैली र करुण रसको प्रयोग सुन्न सकिन्छ। गीतमा सीमा पोख्रेलको सङ्गीत रहेको छ।  

श्रद्धाञ्जली गीत कम नै बन्ने गरेको अहिलेको समयमा अग्रज कलाकारको महत्व र योगदानलाई बचाइराख्न र नयाँ पुस्तालाई पुरानाको योगदान याद गराइराख्न गीत तयार पारिएको गायक न्यौपानेले बताए। सीमा पोख्रेल निर्मात्री रहेको यस श्रद्धाञ्जली गीतको भिडियोलाई सीमा पोख्रेल ‘जस्ट लभ युट्युब च्यानल’मार्फत सार्वजनिक गरिएको हो।