नरेन्द्र र कान्छीमायाले जिते काठमाडौं म्याराथनको उपाधि

काठमाडौं, पुस ५ : १३ औं काठमाडौं म्याराथनको उपाधि पुरुषतर्फ नेपाली सेनाका नरेन्द्र सिंह रावत र महिलातर्फ एपीएफकी कान्छीमाया कोजुले हात पारेका छन्। उनीहरुले मेडल, प्रमाण पत्र र ट्रफीका साथै नगद ५० हजार प्राप्त गरेका छन्। 

म्याराथनमा नयाँ नाम लेखाउँदै नरेन्द्रले ४२.१९५ कि.मि.को दूरी २ घण्टा ३३ मिनेट १० सेकेन्डमा पूरा गर्दै उपाधि उचालेका हुन्। उनले सेनाकै बेदबहादुर सुनुवारलाई पछि पार्दै जित निकालेका हुन्। बेदबहादुरले २ घण्टा ३४ मिनेट २० सेकेन्डमा दूरी पूरा गरे। तेस्रो स्थानमा रहेका सेनाकै ज्ञानप्रसाद भट्टराईले २ घण्टा ३४ मिनेट ४५ सेकेन्डमा दूरी पूरा गरे।

महिलातर्फ कोजुले २ घण्टा ५७ मिनेट २७ सेकेन्डमा दूरी पार गरिन्। कोजुको यो लगातार तेस्रो उपाधि हो। दोस्रो स्थानमा रहेकी सेनाकी सरिता बासीले ३ घण्टा १९ मिनेट ०७ सेकेन्ड र तेस्रो स्थानमा रहेकी निर्जला ताम्राकारले ३ घण्टा ४७ मिनेट ४५ सेकेन्डमा दूरी पुरा गरिन्।

विजयी शीर्ष तीन खेलाडीहरुले मेडल, प्रमाण पत्र र नगद ५० हजार, २० हजार र १५ हजार प्राप्त गरे। 

प्रो स्पोर्टसको आयोजनामा भएको प्रतियोगिताको हाफ म्यारथनमा पुरुषतर्फ सेनाका राजन रोकायाले १ घण्टा १० मिनेट २६ सेकेन्डमा पूरा गर्दै स्वर्ण हात पारे। दोस्रो स्थानमा हरि रिमालले १ घण्टा ११ मिनेट १३ सेकेन्डमा र तेस्रो स्थानमा रहेका सेनाकै रामजी बस्नेतले १ घण्टा ११ मिनेट २१ सेकेन्डमा दूरी पूरा गरे। 

महिलातर्फको हाफ म्याराथन सेनाकी पूर्ण लक्ष्मी न्यौपानेले जितिन्। उनले निर्धारित दूरी पूरा गर्न १ घण्टा २८ मिनेट ०३ सेकेन्ड लगाइन्। सेनाकै सानु माया कार्कीले १ घण्टा ३० मिनेट ०१ सेकेन्डका साथ दोस्रो र पुलिसकी रेखा विष्टले १ घण्टा ३१ मिनेट ३४ सेकेन्डका साथ तेस्रो स्थान प्राप्त गरे।

विजयी शीर्ष तीन खेलाडीहरुले २० हजार, १३ हजार र ७ हजारसहित मेडल प्रमाण पत्र प्राप्त गरे।

विजयी खेलाडीहरुलाई प्रदेश नम्बर ३ का उद्योग, पर्यटन, वन तथा वातावरण मन्त्रालयका सचिव शिवकुमार वाग्ले, पूर्व सशस्त्र प्रहरी बलका महानिरीक्षक सिंहबहादुर श्रेष्ठ, ओलम्पियन बैकुण्ठ मानन्धर, क्याथी ड्रागनका अभित श्रेष्ठ, डाईनिङ्ग पार्कका आभाष पाण्डे लगायतले पुरस्कार वितरण गरेका थिए।