सन्दीपलाई पुर्पक्षका लागि थुनामा पठाउन अदालतकाे आदेश
काठमाडौं जिल्ला अदालतका न्यायाधीश माधवप्रसाद घिमिरेको इजलासले सन्दीपलाई पुर्पक्षका लागि थुनामा पठाउने आदेश दिएको हो।
काठमाडौं, कात्तिक १८ : काठमाडौं जिल्ला अदालतले नाबालिग बलात्कार मुद्दामा क्रिकेटर सन्दीप लामिछानेलाई पुर्पक्षका लागि थुनामा पठाउन आदेश दिएको छ ।
शुक्रबार काठमाडौं जिल्ला अदालतका न्यायाधीश माधवप्रसाद घिमिरेको इजलासले सन्दीपलाई पुर्पक्षका लागि थुनामा पठाउने आदेश दिएको हो।
मंगलबारदेखि सुरु भएको थुनछेक बहस शुक्रबार सकिएको थियो । बहस सकिएलगत्तै उनलाई केन्द्रीय कारागार जगन्नाथ देवलमा पठाउन आदेश भएको छ ।
अब उनले मुद्दाको अन्तिम फैसला नहुन्जेलसम्म थुनामै बसेर मुद्दाको प्रतिवाद गर्नेछन् ।
जिल्ला सरकारी वकिलको कार्यालय काठमाडौंले सोमबार लामिछानेविरुद्ध १० देखि १२ वर्ष सम्म कैद र पीडितलाई अभियुक्तबाटै यथोचित क्षतिपूर्ति भराउन मागदाबी गर्दै काठमाडौं अदालतमा मुद्दा दायर गरेको थियो।
सन्दीपको पक्षबाट वरिष्ठ अधिवक्ता रमण श्रेष्ठ, कृष्ण सापकोटा, सविता भण्डारी, लभ मैनालीलगायतले लामिछानेको पक्षबाट बहस गरेका थिए ।
