शीर्ष नेताको हेलिकोप्टर खर्च निगरानी गर्न अख्तियारलाई निर्वाचन आयोगको पत्र 

काठमाडौं, कात्तिक ७ : निर्वाचन आयोगले प्रधानमन्त्री, विभिन्न राजनीतिक दलको उच्च नेतृत्वमा रहेका व्यक्ति तथा मन्त्रीहरु समेतले हेलिकोप्टर सेवा प्रयोग गर्दा लागेको खर्चको व्ययभार सरकारी कोषमा पर्छ कि पर्दैन भन्ने स्पष्ट पार्न निर्देशन दिएको छ । 

आयोगले आज विज्ञप्ति जारी गर्दै कुन प्रयोजनका लागि हेलिकोप्टर प्रयोग भएको हो भन्ने जानकारी दिन प्रधानमन्त्री कार्यालयलाई निर्देशन दिएको हो । 

आयोगले प्रधानमन्त्री, विभिन्न राजनीतिक दलको उच्च नेतृत्वमा रहेका व्यक्ति तथा मन्त्रीहरुले हेलिकोप्टर प्रयोग गर्दा लागेको खर्च कुन राजनीतिक दलको खर्चको सीमाभित्र पर्ने हो सो खुलाएर पठाउन र हेलिकोप्टर प्रयोग गर्ने पदाधिकारीसँग सम्बन्धित दलहरुलाई लेखी पठाउने निर्णय पनि गरेको छ । 

आयोगले हेलिकोप्टरलगायतका सरकारी साधनको उपयोग भएको विषयमा आवश्यक निगरानी तथा अनुसन्धान गरिदिन अख्तियार दुरुपयोग अनुसन्धान आयोगलाई अनुरोध समेत गरेको छ ।