कात्तिक ८ गते सूर्यग्रहण लाग्ने, स्वाती नक्षत्र र तुला राशिकालाई अतिकष्ट

काठमाडौं, कात्तिक ४ : कात्तिक कृष्ण औँसीका दिन कात्तिक ८ गते मंगलबार  ग्रस्तासत खण्डग्रास सूर्यग्रहण लाग्ने भएको छ।

दिउँसो ४ः५२ बजेदेखि ग्रहणले स्पर्श गर्ने छ । ग्रहणकै अवस्थामा बेलुकी ५:२४ बजे सूर्यास्त हुनेछ।

नेपालबाट करिब ३२ मिनेट ग्रहण देखिने छ । बेलुकी करिब साढे ७ बजेसम्म ग्रहण रहने जनाइएको छ । शास्त्रीय मान्यता अनुसार सोमबार राति ४ः५२ बजेदेखि नै बाल, वृद्ध र आतुर बाहेकलाई भोजन निषेध हुने नेपाल पञ्चांग निर्णायक विकास समितिले जनाएको छ।

यस सूर्यग्रहणमा स्वाती नक्षत्र र तुला राशिका व्ययिक्तलाई अतिकष्ट रहेको समितिले जनाएको छ।

समितिले प्रकाशन गरेको वि.सं २०७९ को राष्ट्रिय पञ्चांगम्मा उल्लेख भए अनुसार कात्तिक ८ गतेको ग्रहण फल अनुसार मेष राशि भएकालाई स्त्रीपीडा, वृष राशिकालाई सुख, मिथुन राशिकालाई चिन्ता, कर्कट राशि भएकालाई व्यथा र सिंह राशि भएकालाई श्रीप्राप्तिको योग रहेको छ।

यसैगरी कन्या राशि भएकालाई क्षति, तुला राशिलाई घात, वृश्चिक राशिलाई व्यय, धनु राशिलाई लाभ र मकर राशिलाई सुखको फल छ भने कुम्भ राशिकालाई माननाश र मीन राशि भएकालाई कष्टको योग छ।