कांग्रेस प्रवक्ता भन्छन्– सहमतिबाटै समानुपातिकको सूची तयार भएको हो, एकलौटी गरिएको छैन 

काठमाडौं, असोज ११ : नेपाली कांग्रेसका प्रवक्ता डा. प्रकाशशरण महतले सहमतिबाटै समानुपातिक सूची तयारी भएको बताएका छन् । 

मंगलबार पार्टी कार्यालय सानेपामा आयोजित पत्रकार सम्मेलनमा प्रवक्ता डा महतले समानुपातिक सूची तयार गर्दा एकलौटी गरिएको भन्ने आरोपमा कुनै सत्यता नरहेको बताएका हुन् ।

‘पदाधिकारी, पूर्व पदाधिकारी, संसदीय बोर्डका सदस्यहरु समावेश भएर सहमतिमा सूची पेश गरिएको हो,’ डा. महतले भने,‘एउटा पक्षलाई पक्षपोषण गरेर अर्कोलाई कमजोर गर्ने केही भएको छैन । यो विषयलाई उठाएर एकलौटी गरियो, छलफल भएन भन्नेमा सत्यता छैन।’

उनले समानुपातिक सूचीका विषयलाई लिएर भइरहेका विरोधहरु अनावश्यक रहेको पनि बताए । उक्त विरोध पार्टी हित र अनुशासन विपरित रहेको पनि उनको भनाई छ । डा महतले विरोधी पक्षलाई नेतृत्व तहले नजिकबाट नियालीरहेको बताएका छन्। 

समानुपातिक सूचीमा एकलौटी गरिएको भन्दै संस्थापन इतर पक्षले आन्दोलनको घोषणा गरेको छ । समानुपातिक सूचीमा इतर पक्षले ४० प्रतिशत सिट पाउनुपर्ने उनीहरुको माग छ ।