प्रतिकुल मौसमका कारण मनास्लु हिमपहिरोमा फसेकाहरूको उद्दारमा समस्या 

काठमाडौं, असोज १० : सोमबार बिहान ८ बजे मनास्लु हिमालमा गएको हिमपहिरोमा परी बेपत्ता भएकाहरुको अहिलेसम्म उद्दार हुन सकेको छैन ।

उद्दारका लागि हेलिकप्टर पठाइएपनि प्रतिकुल मौसमका कारण बेपत्ताहरुको खोजी हुन नसकेको गोरखाका प्रहरी उपरीक्षक केदार खनालले जानकारी दिए। 

बिहान ८ बजे गएको हिमपहिरोमा परी आरोहण दलका केही सदस्य र भरियाहरु बेपत्ता भएको खबर आएलगत्तै उद्दार र खोजीको प्रयास भएपनि मौसम बाधक बनेको एसपी खनालले बताए । 

उनका अनुसार बेपत्ता हुनेहरुमा पाँच जना शेर्पा रहेका छन् । अन्य के कति छन् भन्नेबारे जानकारी प्राप्त नभएको उनले बताए । हिमपहिरोमा परेकाहरु सामान्य घाइते भएको जानकारी आएको पनि उनले बताए । 

बेपत्ता आरोहीहरुको खोजीका लागि सिम्रिक र एभेरेष्टका हेलिकोप्टर  परिचालन गरिएको छ । तर मौसम खराबीका कारण मनास्लुको ३ नम्बर ४ नम्बर बेस क्याम्पका लागि पठाइएका हेलिकोप्टर अवतरण गर्न नसकी फर्किएका छन्। 

फर्किएका हेलिकप्टरहरुलाई स्ट्याण्डबाइ राखिएको र एउटा हेलिकप्टर आवश्यक पर्दा आउने भनि काठमाडौं फर्किएको एसपी खनालले जानकारी दिए।