गृहमन्त्रीका पीएसओमाथि अनुसन्धान शुरु

काठमाडौं, भदौ ८ : नेपाल प्रहरीले गृहमन्त्री बालकृष्ण खाणको ‘सुरक्षा समूह’मा खटिएका प्रहरी वरिष्ठ नायब निरीक्षक टङ्क कार्कीमाथि अनुसन्धान थालिएको स्पष्ट पारेको छ।

केही दिनदेखि सञ्चारमाध्यममा ‘सुन तस्करसँग गृहमन्त्रीको सुरक्षार्थ खटिएका पीएसओ टङ्क कार्कीको संलग्नता’ भन्ने समाचारप्रति गम्भीर ध्यानाकर्षण भएको जनाउँदै प्रहरीले छानबिन तथा अनुसन्धान भइरहेको जनाएको छ।  

केन्द्रीय प्रहरी प्रवक्ता, प्रहरी नायब महानिरीक्षक टेकप्रसाद राईले विज्ञप्ति जारी गरी कार्कीलाई प्रहरी प्रधान कार्यालय सुपरिवेक्षण तथा अनुगमन महाशाखामा झिकाई छानबिन तथा अनुसन्धान भइरहेको बताएका छन्।

'छानबिन तथा अनुसन्धानपश्चात् उनी दोषी देखिए कानूनबमोजिम कारबाही गर्ने व्यहोरासमेत अनुरोध गर्दछु,' राईद्वारा जारी विज्ञप्तिमा भनिएको छ।