बजेटमा नतोकिएका नयाँ कार्यक्रम सञ्चालन नगर्न आयोगको निर्देशन

काठमाडौं, भदौ ४ : निर्वाचन आयोगले बजेटमा नतोकिएका नयाँ कार्यक्रम सञ्चालन नगर्न तीनै तहका सरकारलाई निर्देशन दिएको छ ।

प्रदेश १ र गण्डकी प्रदेशले ‘निर्वाचन क्षेत्र पूर्वाधार विशेष कार्यक्रम’ लागू गर्ने तयारी गरेपछि अयोगले शनिबार एक विज्ञप्ति जारी गर्दै बजेटमा नतोकिएका नयाँ कार्यक्रम सञ्चालन नगर्न–नगराउन नेपाल सरकार, प्रदेश सरकार र स्थानीय तहलाई निर्देशन दिएको हो ।

योजना र बजेटमा नतोकिएको नयाँ कार्यक्रम सञ्चालन गर्दा मतदातालाई प्रभावित पार्ने एवं निर्वाचनको स्वच्छता र निष्पक्षतामा प्रभाव पार्न सक्ने देखिएकाले आयोगले त्यस्ता कार्यक्रम कार्यान्वयन नगर्न तीनै तहलाई निर्देशन दिएको हो ।

विपद् व्यवस्थापनसम्बन्धी कार्य, मानवीय सहायता प्रदान र स्वास्थ्य महामारी रोकथाम गर्न आवश्यक कार्य बाहेक कुनै पनि प्रकारका नयाँ आयोजना तथा कार्यक्रम सञ्चालन तथा कार्यान्वयन नगर्न तीनै तहलाई निर्देशन दिइएको आयोगका प्रवक्ता शालिग्राम शर्मा पौडेलले जानकारी दिए।