नेपालीलाई नागरिकताविहीन बनाउने अधिकार राष्ट्रपतिलाई छैन : रिजाल

काठमाडौं, भदौं २ : सत्तारूढ नेपाली कांग्रेसका नेता डा. मीनेन्द्रप्रसाद रिजालले नेपालीलाई नागरिकताविहीन बनाउने अधिकार राष्ट्रपतिलाई समेत नभएको बताएका छन् । 

बिहीवार प्रतिनिधि सभा बैठकमा राष्ट्रपतिले फिर्ता पठाएको नागरिकता विधेयकमाथिको छलफलमा भाग लिँदै उनले जस्तोसुकै सम्मानित पद भए पनि नेपालीलाई नागरिकताविहीन बनाउने अधिकार नभएको बताएका हुन् । 

नागरिकता विधेयक ढुङ्गाको अक्षर नभएको उल्लेख गर्दै नेता रिजालले त्यसलाई तत्काल पारित गरेर लैजानुपर्ने बताए । संसद्को कुनै पनि सदस्यलाई नेपालीलाई नागरिकताविहीन बनाउने अधिकार नभएको पनि उनले स्पष्ट पारे । 

उनले केपी शर्मा ओली नेतृत्वको सरकारले अध्यादेश ल्याउँदा राष्ट्रपतिले फिर्ता गर्न नमिल्ने तर्क गर्ने एमाले सांसदहरूले अहिले आएर विधेयक फिर्ता गर्दा भने उपयुक्त छ भनेर भनेको सुन्दा आफू चकित भएको बताए ।